Moansch.net? - Blog aus Südtirol

Wia long werds dauern, biss die SMG Südtirol in Second Life nochbaun losst? Die VOG hots jo schun vorgmocht...

Ersch heit hon i wieder mit an Kollegn aus der Bronsch ( ) gredet. Er hot gmoant, dass die Goschtwirt huier Mai/Juni/Juli brutal viel gjammert hobn, weil sou weanig Leit kemmen...

Und donn kemmen de Zohln do.

Hmm....

Wia i schun öfters gschrieben hon, bin i a neigieriger Mensch. Unter onderem interessiert mi a, wos die Tiscover a sou treib. Unter onderem hot die Tiscover jo als "greaschten Auftrog der Firmengeschichte" es nationale Tourismusporjekt www.italia.it gekreag. Insgesomt a 45 Mio EUR Projekt, welches an a Konsortium (Tiscover, Ibm, Its) vergeben gwurdn isch.

Ob und zua schaug i auf der Seit von der SMG aui, weil man zem dechtersch olleweil wieder interessante Sochen findet. Vorhin bin i gonz überroscht gwurdn... oanmol weil i auf a nuie Domain weitergleitet gwurdn bin (aus suedtirol-marketing.info isch smg.bz.it gwurdn) und donn weil do a nuie Version von der Seit online wor.

Wia iberoll gibs a im Tourismus Grenzen. Net lei moralische, ökologische oder ökonomische... a geografische Grenzen. Mir kimp fir, dass de oft saggrisch in Hund eini mochn.

Der Süden Südtirols geat z.B. aui bis aufn Penser Joch. Sell isch schun a bissele komisch, wenn der Norden (Sterzing) vom Süden (Tramin) aus schneller erreichbor isch, als der Süden (Penser Joch) vom Süden (Tramin) aus. Isch schun klor, dass man TVs und TVBs Ressourcen sporen muas... ober interessiert sell unsere Gescht? Und ob "Bozen und Umgebung" die bessere Lösung isch?

Wos mir schunsch nou sou einfollt:

• Ob die Kolterer und die Traminer sich irgendwenn amol zommenderrafn?
• Isch die Mendelbohn komplett in Koltern, oder ligg die Bergstation in Ruffrè?
• DolomitiSuperSki isch jo a wunderbors Beispiel, wia grenzenübergreifende Zusommenorbeit funktionieren konn.
• Die Meraner (mit Umgebung) hobn jo vor kurzem a endlich Ihre komischen Untertoalungen aufglossn, und hoasn eats einheitlich Meranerland.
• Interessant isch a, dass viele Italiener Südtirol moanen, wenn Sie Trentino sogn.
• Hobs es gwisst, dass es Puschtertol bis Lienz oi geat? (a wenn die Oschttiroler die Südtiroler eher als Konkurrenz onschaugn)

Sette Beispiele (positive und negative) gibs sicher nou wia Sond am Meer. Wos mi holt ollm schod deicht, isch wenn politische Mochtspielchen und Kirchturmdenken marketingtechnisch clevere geografische Einheiten ausanonderreissn, oder in an ressourcenschporenden Topf werfen.

Südtirol hot die Oschtsee im Regionenranking gschlogn. Laut a Auswertung von 3,5 Millionen Routenberechnungen vom ADAC-Reiseservice, isch Südtirol im Johr 2006 von Plotz drei aufn erschten Plotz auigrutscht.

Des werd in Engl frein!

Man konn ober a sogen wos man will... von mir aus gsechn mocht die SMG a guate Orbet (wenn man a es Oane oder Ondere onderscht mochen kannat). Insgesomt passts holt. Die TVs und TVBs spielen mit, die Hoteliers a, und rund um die Tourismus-Leistungsträger hot sich a guats vielfältiges Kommunikationsongebot entwickelt. Die aktuelle Tourismus-Studie (PDF) vom ASTAT weist a auf an positiven Trend hin.

Deswegen Leitlen, lei net nochgeben. Erfolg verpflichtet!

OK. Endlich hon i mein eigenen Blog. Und weil i eh nix zu sogen hon, holt i für mi persönlich amol die Südtiroler-Blogs fescht, de mir im Laufe der Zeit übern Weg gloffn sein:

• suedtirol-blog.com
  Der Martin isch schun amol fleißiger gwesn. Oan gonz interessanten Eintrog muas i ober feschtholten.
• spaghetti-mit-knoedel.com
  Der Frankie isch eher kritisch unterwegs.
• blog.bytesinmotion.com
  Der Andi bloggt gonz fleißig, net lei über mountainbikes.
• blog.suedtirol-reisen.com
  Oschpele, foscht vergessen. Der Herbert blogt jo a wia a Wilder. Logischerweise geats öfter amol ummen Südtiroler-Dialekt.
• ploerr.com/wandertouren
  Jo, wieder der Herbert. Wenns ums Wondern geat, am beschten im frogen.
• suedtirol.org
  Isch zwor auf Blog-Technologie aufgebaut, ober eher a PR-Plattform. Ober egal...
• suedtirol.blogspot.com
  Die SMG/Sinfonet-Connection probiert sich in Web 2.0
• suchen.net
  Hmmm.... wos sich die Internet-Consulting ba den Blog woll gedenkt hot? (bitte net beas werdn )
• selbstbestimmung.net
  Brennerbasisdemokratie mit interessanten Themen und Diskussionen. Ober wos les i do? Bitte mochts weiter!

Obgsechen von de do oben kenn i nou a poor politisch ausgerichtete Blogs. Ober Wohlwerbung will i eatz do net mochen.

Folls i irgendjemand übersechen hon (wos i foscht sicher bin), bitte eini in Link in die Kommentare.