Moansch.net? - Blog aus Südtirol

I hon schun schmunzeln gmeaßt, wenn ich gsechn hon, welche Partei heit auf die Seitn 13, 15, 16, 17, 18, 19, 23, 25, 26, 29, 31, 32, 33, 35 und 36 vom Togblattl von die Sidtirouler Besserung geloubt hot.

... traun sich ober eppes. De hobn im Johr 2001 dron gedenkt, dass man eventuell planen kannat es Biro vom Luis zu verwonzen.

Von insern Londesluis!!

Wos werd denn in de grittn hobn? Wissn de net wer inser Luis isch? Wenn amol a poor tausend Leit in Italien iber 10 Johr systematisch ogheart werdn... so sell konn schun amol vorkemmen. Ober in Luis ohearn? Schkandal!!!!

Also i tat sogn:

• Dron denkn, dass man eventuell kannet planen es Biro zu verwonzen isch schun schkandalös.
• Direkt schun zu planen, es Biro zu verwonzen sell waret schun... also sell waret schun... sell measat man schun bestrofen!
• Es Biro vom Luis zu verwonzen (i terf net dron denken, mir schtöllts die Hoor auf), also sell measat... also sell measat mit an Putschversuch, mit Revolution, mit Verrot gleichstölln. Millionen von aufrechtn Tirolern tatn die Privatsphäre von ihrn Kapo mit olter Einigkeit verteidign und tatn amol in de Carabinieri zoagn wos es hoast in Luis ozuhorchn!

Deswegen isch es schun richtig, dass der internationale Schkandal in insern bevorzugtn Togblattl auf der Titelseit broat getreten werd. Weil mir Sidtirouler measn zommenholtn... iberhaup eatz, wenns nor wieder longsom auf die Wohln zua geat.

Schun sei a poor Tog sigg man ollm wieder Under-Cover-Werbung in insern hoaßgeliebten Sidtirouler Togesblattl, in dor Dolomiten. Und zwor werd do in der werten Leserschoft unterschwellig mitgetoalt, dass die Athesia-Druck die beschtn sein, weil eatz hobn sie a nuie 10-Forben-Maschin gekaft. Super, auf de Meldungen hot die Welt gwortet.

Geschtern hobn sie dem gonzen nou amol a Sahnehäubchen aufgsetzt und a redaktionelle Doppelseit ver(sch)wendet um über die Einweihung von der Maschin zu berichten.

Mamma mia! Leitlen, a wenns die längschte Maschin in Südtirol isch.... es wert öfter amol irgendwo inveschtiert... a ohne dass es glei in der Zeitung schtean muas. Mir persönlich zoag de Aktion und sellene, wia z.B. die vom Ebner persönlich aufn Brenner obn geretteten Hundelen (de er donn mit Gewinn verkaft hot und iber de donn a ibor Wochen groaßzigig in der Dolomiten berichtet gwurdn isch), dass die Athesia heit Ihre Interessn und Imageaufpolierungsaktionen net amol mehr unterschwellig unter die Leit brengen muas. De kennen sichs leischten des gonz offen(sichtlich) im redaktionelln Toal zu mochn.