Moansch.net? - Blog aus Südtirol

Souviel Poscht wia olleweil hon i schun long nimmer kreag. Mir schreibn do viele Leit, de lei mein Beschts wölln. De hobn olle brutal viel für mi geton, sein olle irgendwia ausn Iberetsch, hobn Verwondte im Iberetsch oder fühln sich mitn Iberetsch verbundn. De wölln sich olle in die nägschtn Johr für mi einsetzn und hoffn auf meine Unterstützung, damit sie sell donn a wirklich tean kennen.

Vor die Wohln geats ollm rund, im Web ober a sunscht. Do werdn Werbeschilder aufgstöllt, wo eigentlich koane schtean terfatn, do werd die Poschtini sou mit Proschpekte in olle Forbn schtrapaziert, dass die normale Poscht olleweil schpäter kimp, und do werdn a Einlodungen zu Wohlversommlungen verschickt.

Dor Hanspeda hot mi drauf aufmerksom gmocht. Die Wohlwerbung schpielt sich olleweil mehr im Web o. Und vor die Wohln zoagn sie olle an brutaln Einsotz:

Do die Südtiroler Volkspartei:

Bsunders gfollt mir ba des Spot von der SVP die Assoziation "Politik = Müll".

Do der Walter und seine Kumpanen:

OK, bewährte Werbekonzepte funktioniert meischtens am beschten.

Und logisch dor Silvio mit Kollegn:

... traun sich ober eppes. De hobn im Johr 2001 dron gedenkt, dass man eventuell planen kannat es Biro vom Luis zu verwonzen.

Von insern Londesluis!!

Wos werd denn in de grittn hobn? Wissn de net wer inser Luis isch? Wenn amol a poor tausend Leit in Italien iber 10 Johr systematisch ogheart werdn... so sell konn schun amol vorkemmen. Ober in Luis ohearn? Schkandal!!!!

Also i tat sogn:

• Dron denkn, dass man eventuell kannet planen es Biro zu verwonzen isch schun schkandalös.
• Direkt schun zu planen, es Biro zu verwonzen sell waret schun... also sell waret schun... sell measat man schun bestrofen!
• Es Biro vom Luis zu verwonzen (i terf net dron denken, mir schtöllts die Hoor auf), also sell measat... also sell measat mit an Putschversuch, mit Revolution, mit Verrot gleichstölln. Millionen von aufrechtn Tirolern tatn die Privatsphäre von ihrn Kapo mit olter Einigkeit verteidign und tatn amol in de Carabinieri zoagn wos es hoast in Luis ozuhorchn!

Deswegen isch es schun richtig, dass der internationale Schkandal in insern bevorzugtn Togblattl auf der Titelseit broat getreten werd. Weil mir Sidtirouler measn zommenholtn... iberhaup eatz, wenns nor wieder longsom auf die Wohln zua geat.

Danke Herbert für den Hinweis, dass a bissele Jammern oanfoch guat tuat! I hon heit schun in genuag Leit die Oarn voll gjammert, wesholb i mi do eatz auf a poor Zitate aus der heitigen Südtiroler Wirtschaftszeitung beschränk:

Aber gezahlt wird nicht
Bozen (SWZ) - Die Auftragsbücher sind noch gut gefüllt in Südtirol, aber sinkende Margen und die hohe Verschuldung vieler Unternehmen machen sich immer stärker bemerkbar: Die Zahlungsmoral ist so schlecht wie nie.
(Mein Kommentar: Schod, dass es zu dem Teufelskreis kemmen isch)

...

Ernst der Lage erkannt?
(We) - Jahrelang hat die Landesregierung die Warnungen vor einer Schwächung des Unternehmensstandortes Südtirol ignoriert. Jetzt wurde Sie aufgeschreckt.
(Mein Kommentar: Guten Morgen liebe Leute! )

...

Weniger Irap, weniger Beiträge?
Landeshauptmann Luis Durnwalder sagt es offen: Die Irap könnte weiter gesenkt werden, wenn die Unternehmen im Gegenzug auf Fördermittel verzichten würden. Wer würde von einem solchen "Tauschgeschäft" profitieren? Die Wirtschaftsszeitung hat nachgerechnet. Das Ergebnis: Diestleister und Kaufleute könnten nur gewinnen.
(Mein Kommentar: koltets enk die Förderungen, bauts des ver...te Bürokratie ob und senkts endlich die Steuerloscht und die Lohnnebenkoschten!)

So, ober genaug gmeitert eatz. Do nou oan Link, der mir trotz der gonzen Miss-Stände in insern selign Landl decht nou mit Freid weitermochn losst:
www.suedtirolerland.it

Update:
des do hett i foscht vergessen (a a Zitat aus der SWZ):

Schuh drückt von Außen
Bozen - Mit ihrer wirtschaftlichen Situation sind Südtirols Unternehmer (großteils) zufrieden, aber die Rahmenbedingungen bereiten ihnen zunehmend Sorgen. Die Steuerlast drückt aufs Gemüt - und nicht nur sie.
(Mein Kommentar: Jojo, die Schteuerloscht...)

EU-weit werd für die freie Wohl des Orztes gekämpft. Dass mir in Südtirol nou weit drvon entfernt sein, sogg mir a Briaf, den i de Woch gekreag hon. Und zwor hon i gwöllt mein Hausorzt wechseln. Mein olter isch in Koltern, wo i aufgwochsn bin. I hon göllt zun Hausorzt von meiner Freindin (mir wohnen in St. Pauls) wechseln, der ober inzwischen in Andrian isch. Er hot mir sou an notwendign Wisch gschriebn, dass er mi dechtersch aufnemmen tat, a wenn i net in sein Einzugsgebiet bin. Do gibs ober nou sou a Kommission de do scheinbor eppes zu sogen hot, und de hot des obglehnt. Guat, eigentlich isch mir des wurscht... ober irgendwia fühl i mi do schun eingschränkt in meiner Freiheit.

Wos gibs schunsch nou? Ah... dor Luis will die Poscht selber austrogn. Typisch: ba ins muas olls vom Lond kontrolliert werdn. Obwohl in den Foll war i lei derfir. Es kennts enk net vorstölln, wia oft i Einlodungen per Poscht kreag, wo es Event schun vorbei isch. Oder der Klassiker: die Mohnung kimp vor der Rechnung. Es isch ba ins in Frongort a schun firkemmen, dass die Poscht gsogg hot: "In die nägschten zwoa Wochn meaßts enkere Poscht selber oholn, weil insere Poschter sein in Urlaub!" - Jo... suuuper. Danke. Und derfir zohln mir ins tumm und teppet mit die Briafmarken. Zum Grausn isch des!

Ober gleich. Nor hon i nou glesn, dass der Silvio eatz a die Telecom Italia kafn will. Bravo. Sell tat zu ihm passn. Soll er glei die Poscht mitkafn, donn hatn mir frisch klore Verhältnisse. Und die Dianschtleischtungsqualität von de boaden Unternemmen passt eh zommen.

Ajo, donn sein sie nou draufkemmen, dass Südtirol net in Amerika isch. Ober sell hat i immene a sogn kennt, Südtirol ligg jo in Bayern!