Des wor es Tourismuscamp 2009 in Eichstätt

• Wenn dor Fohrer sich wochholtet, indem er über de gonzn Twitter-Junkies herziacht, nocher sollet der Kopilot net genau des twittern, wos dor Fohrer im Affekt (und lei als bledn Scherz gmoant) vorschlog. Vor ollem, wenn man genau woas, dass die derzua passende Twitterwall per Beamer vor die versommeltn Teilnehmer im Barcamp ongezoag werd.
• Wenn man an Tweed löschen will, sollet man sich vergewissern dass er a wirklich glöscht isch!
• Man sollet ban Empfong es Nomensschildl des man kreag lesn. Wenn man sell net tuat, und später donn draufkimp dass dor Nomen folsch gschriebn isch, sollet man sich interessiern obs net jemand auf der Veronstoltung do gib, der ähnlich (ober ebn net genau gleich) wia man selber hoast, und net oanfoch aufn Schildl umanonderkratzln!
• Gourmet-Journalisten measn a ob und zua a Runde zohln!
• Gastronomie-Profis wirkn gonz ongschponnt, wenn sich hintern Budl die ungschicktn Studentinnen potschet onstölln.
• Ober wenn sie an Durscht hobn, erklärn de Gastronomie-Profis in de ormen Madlen gonz genau wos sie hobn wölln, und wos es koschtn terf.
• Reggae-Feten sein luschtig!
• In Deitschlond isch man auf der Autobohn a mit 215 km/h oftramol Verkehrshindernis und werd mit passend nervesem Aufblendn und schportlich dichtem Auffohrn von der Iberholspur gjogn.
• Die Deitschn und die Striezis kennen und kennen oanfoch koan Kaffee mochn. (ober wos sog i denn, sell isch jo nix Nuis)

Wia gsogg... wichtige Erkenntnisse, de i nimmer missn mechat.

Ajo, donn wor do nou es Barcamp. Sell wor pärig, richtig guat und professionell organisiert. Komplimente Leitlen! Interessant derbei: a aufn Obend sein die Organisatoren ollm mittlt im Geschehen gwesn. Reschpekt!

Die Leit und die Themen worn wia erwortet sehr interessant. Vielleicht sein 100 Teilnehmer zuviel für a Barcamp (wia schun mehrere gsogg hobn). Es entschtean weaniger Diskussionen als in kloaner Runde.

Wos glab i nou zu an relaxtem Diskussionsklima beitrog, isch die Sitzordnung. Sell wor z.B. ban Castlecamp ideal. Logisch werd des ob a gewisser Teilnehmerzohl schwierig.

Super wor die Live-Übertrogung und die Twitter-Wall. A pärige Idee, und a super umgsetzt. Bravo!

Zu die Themen... jo, wos soll i sogn. Oanfoch interessant. I will eatz do gor net onfongen über die oanzelnen Sessions zu schreibn, weil zem wer i nimmer förtig. Soviel vielleicht als Zusommenfossung: i glab (meine gonz persönliche Meinung), dass nou niamand mit de Web2.0-Gschichten im Tourismus a Gschäftsmodell gfunden hot, von dem man a lebn konn. Olle orbetn mit Begeischterung an Konzepte, Blogs, Communities in der Erwortung irgendwenn in Zukunft a passendes Gschäftsmodell zu finden. I glab mir befinden ins olleweil in a Trendwende, ähnlich wia Ende der neinziger Johr. Viel wos gmocht werd isch von Onfong on a Totgeburt. Ober wenn man a bissele woch isch, sich die Sochn genau onschaug, und donn a genau des mocht, wos laut Hausverschtond a funktioniert und vom "normalen" User verschtondn werd (und ihm an echtn Mehrwert biatet), donn glab i hot man heit (genau heit) die Chance die Weichn für a tolls Business zu schtölln. Obor wia gsogg: aufn Bodn bleibn, Hausverschtond einscholtn, und net ollm dervon ausgean dass olle User Twitter-Junkies sein!

Und genau deswegn rentiert sich der Besuach von settene Barcamps. Man kreag mit wos die Leit tean, wos funktioniert, wos weaniger, konn sich austauschen und sich sein eigenen Reim auf de gonzen Sochn mochn. I wer auf jedn Foll ba die nägschtn touristischn Barcamps wieder derbei sein!