Jo wos will i denn eatz?!

Die oane schreib mir, dass sie genau woas wos i will und dass i für die Chancengleichheit bin. Also konn i lei sie wähln. Der ondere moant, i soll ihm wähln, weil er sich ollm schun in die Gewerkschoften für mi eingsetzt hot (wenn i den amol persönlich derwisch, donn ...). Nou oaner isch von an Dorf glei nebnen Iberetsch, setzt sich für die Senioren ein, hot ober Verwondte im Iberetsch. Ober donn schreib der oane oder ondere, dass mir an storken Luis brauchn. Und die Wirtschoft muas a zommenholten, und i als Kaufleutemitglied sollet insern Vertreter unterstützen. Ober der Tourismus muas a unterstützt werden und die Bauern sowieso. Und i will jo a Überetscher Bohn, und der oane hot sich ollm schun für öffentliche Verkehrsmittel eingsetzt, also muas i ihm wähln.

Und des lei von oaner Partei, gonz zu schwiegn von die ondern.

A (braun-)blaue Gruppe woas jo genau, dass i meine Kinder im Kindergorten unter seinesgleichen wissen will, und dass mir Sidtirouler holt ollm erschter kemmen solln und dass "die" Partei endlich amol an Denkzettl braucht und dass souwieso lei sie Südtirol rettn kennen. (ober ohne mi)

Der ondere rennt in jedn Thema noch, isch iberoll der erschte gwesn ders ongschprochn hot und holtet ollerhond Redn vor laare Plätz und schimpft seit ollm schun gegen "die" Partei. I hett ihn zu wähln, weil er woas wos mir brauchn. (wenn i mir sou onschaug, wos der in die leschten Johr sou aufgfiart hot, donn tat i sogn dass Stimmen für ihn für die Tonne sein)

Nou a ondere isch wenigschtens seit ollm schun auf der gleichen Schiene und will unbedingt die komplette Unobhängigkeit für Sidtiroul. Wos jo on sich net schlecht waret wenn do net der suspekte junge Politiker ollm ba ihr derbei war, der mir a bissele zu zwielichtig isch...

Ah, ollerhond Gruppierungen für die Bürger und für die Umwelt und gegen die Monotonie in der Südtiroler Politik wissen zwor genau, gegn wen und wos sie sein, ober irgendwia kimp net ummer, für wos sie sein bzw. welche konkretn Sochn sie umsetzn wölln. Edle Intentionen und Visionen ober weanig Hondfeschts also.

Und a traditionell italienische Partei präsentiert sich auf oan mol doppelschprochig hot an Haufn deitsche Kandidaten und glab zu wissn, wos sich meine Kinder fir a Hoamat tramen.

I woas net, jeder sogg, i soll de oder den wählen, jeder woas am beschten wos i will.

Jo wos will i denn eatz?