Moansch.net? - Blog aus Südtirol

"Los von Rom" - Schunsch kennt man sette Schprich eher von die
eigenen Leit do in Sidtiroul. Seit nuigschten sogn des a ondere: San Pietro di Cadore tat gern zu Öschterreich kearn. Als
Hauptgrund werd der Schtuierdruck und die zur Verfigung schteaenden
öffentlichen Gelder pro Kopf gnonnt.

A wenns nix bringen werd, so wer i des sicher mit Interesse verfolgen, weil hetzig isch es ollemol!

Ohne Bledsinn: der Google-Mitarbeiter Bram Moolenaar werd in nägschtn Freitig, 16. November in Meran sein, und zwor ba der SouthTyrol Free Software Conference 2007. Jojo, Südtirol werd olleweil wichtiger!

I wer auf jeden Foll versuachn mir die Zeit zu nemmen und des gonze onzuschaugn. Weil neben den Google-Mitorbeiter sein do nou an Haufn ondere interessante Leit mit interessante Themen.

Vielleicht trifft man sich zem!

Schun sei a poor Tog sigg man ollm wieder Under-Cover-Werbung in insern hoaßgeliebten Sidtirouler Togesblattl, in dor Dolomiten. Und zwor werd do in der werten Leserschoft unterschwellig mitgetoalt, dass die Athesia-Druck die beschtn sein, weil eatz hobn sie a nuie 10-Forben-Maschin gekaft. Super, auf de Meldungen hot die Welt gwortet.

Geschtern hobn sie dem gonzen nou amol a Sahnehäubchen aufgsetzt und a redaktionelle Doppelseit ver(sch)wendet um über die Einweihung von der Maschin zu berichten.

Mamma mia! Leitlen, a wenns die längschte Maschin in Südtirol isch.... es wert öfter amol irgendwo inveschtiert... a ohne dass es glei in der Zeitung schtean muas. Mir persönlich zoag de Aktion und sellene, wia z.B. die vom Ebner persönlich aufn Brenner obn geretteten Hundelen (de er donn mit Gewinn verkaft hot und iber de donn a ibor Wochen groaßzigig in der Dolomiten berichtet gwurdn isch), dass die Athesia heit Ihre Interessn und Imageaufpolierungsaktionen net amol mehr unterschwellig unter die Leit brengen muas. De kennen sichs leischten des gonz offen(sichtlich) im redaktionelln Toal zu mochn.