Linux rocks!

Ober die Desktops auf Linux zu brengen, wenn man X Johr unter Win gorbeitet hot, isch net so ohne. Net dass Win besser waret als Linux... na. Ober im Laufe der Johre sommeln sich so Ongewohnheiten und Programmelen on, de schwar auf Linux zu brengen sein. (WINE geat lei bis zu an bestimmten Punkt guat)

Wia auch immer. Auf jeden Foll isch der Massimo (inser Migration-Manager) schwar auf Droht. Ba die gonz stinknormalen Office-PCs (Firefox, Thunderbird, OpenOffice.org) gibs sowieso koan Problem. Oanzig a kloane Unstimmigkeit ban mounten von die Samba-Shares hots gebn, ober sem hot der Massimo schnell a kloans Programml gschriebn, so dass mir de wieder mountn kennen, (foscht) wia mirs unter Win gwehnt sein.

Donn hot er für unsern nuin Schulungsraum a Lösung mit Edubuntu gezaubert. Ob morgen booten 10 Clients übers Netz von oan LTSP-Server! (Gibs sou eppes unter Win überhaupt?)

Ober wieso i überhaup schreib: auf meine Laptops hon i eigentlich ollm schun a Dual-Boot oubn kopp. I hon also ollm wohlweise Win oder Linux startn kennt. Bis eatz hon i mehr oder weaniger mit Linux ollm a bissele ummerspielt, irgendwenn bin i ober ollm stuff gwesn die kloanen ober brutal eirigen Problemelen lösn zu measn, weil i orbeitn hon gmeast, und koan Zeit zum ummerbaschglen ghob hon.

Sou a mit der löschten Linux-Installation auf mein Notbook (2005), wo a Ubuntu 5.10 wor (Breezy Badger). Die sell hot sich zem relativ oanfoch installiern glossn. Mit der Grafikkort hon i a Problem ghob, wou man hot gmeast a bissele ummerbaschgeln. Die Wireless-Gschichten sein mir unter der olten Ubuntu zu umständlich zu konfiguriern gwesn... es kennts enk schun denkn, i hon de Ubuntu seit über an Johr nimmer gebootet.

Heit hot mi dor Massimo gfrogg, wos eigentlich mit mein Laptop isch. Wenn mir in sem migriern mechatn... Und weil i grott Luscht ghob hon, hobn mir probiert die nuieschte Ubuntu (7.04, Feisty Fawn) zu installiern...

I muas sogn, i bin baff gwesn. Aufn erschten Blick hot sich net viel geändert, ober schun die Installation isch schneller gongen als erwortet, und vor ollem.... i hons alloan zommenderstöllt. Und sell will eppes hoasn! Sogor in Treiber von der Grafikkort hots automatisch vorgschlogn zu installiern.

Eatz spiel i grott mit den Ubuntu ummer, unter onderem hon i probiert in VPN-Client von der Endian-Firewall zu installieren. Sell isch fir mi wichtig, weil i schunsch von extern net auf unser Firmennetzwerk zuagreifen konn.

Die Geeks von Endian sein jo a net aufn Kopf gfolln, und hobn a Installationspaket (.deb) für Ubuntu bereitgstöllt. Orglodn, doppelklick, installiert! Jo, Leitlen, so mochts Spaß.

Wias ausschaug, isch eatz der Zeitpunkt kemmen, wo Linux a für sette oberflächliche User, wia i oaner bin, komfortabel aufn Desktop einsetzbor isch. (Aufn Server gibs jo aus meiner Sicht sowieso seit 2000 koane Alternative)

Es gib zwor nou es oane oder ondere Programml, des unter Linux net verfügbor isch, und des i oftramol brauch, ober i glab mir wern ins zem longsom noch Alternativen umschaugn. Und derweil konn i de Programmelen in a virtueller Maschin (Windows unter Linux ) startn. Der Massimo hot gsogg, do gibs a poor freie Projekte, de out of de box unter Ubuntu lafn...

Amol schaug, ob is desmol durchderziag, und Win für mi Vergongenheit isch...