Moansch.net? - Blog aus Südtirol

Dass Südtirol schean isch, des wissn net lei insere Marketingverontwortlichen oder insere Gescht. Na, des wissn a mir Südtiroler. Oftramol wern mor von der Scheanmolerei in der Tourismuswerbung a bissele fruschtriert, wos bon oan oder ondern a amol interessante Reaktionen ausser bring.

Geschtern isch mir a kurzer Link in meiner Mailbox glondet. Den will i enk net vorentholten:

www.suedtirol-ist-schoen.eu

Interessante Perschpektivn. Für sich alloan gsechn isch des schun a bissele Schworzmolerei. Ober de Bilder sein Realität. Wenn mir ins überlegn, wos mir in insere Gescht eigentlich verkafn, sollatn mir oftramol übers oane oder ondere Projekt nouamol genauer nochdenken, bevor mir tonnenweise Beton in insere Londschoft giaßn.

I bin gschponnt, welche Reaktionen des Projekt hervorrufen werd.

Heit amol eppes Lokales:

Ba ins im Überetsch gibs haufenweise Ensembles zu schützen. Der Überetscher Stil will erholten bleiben, und insere Dorfprominenz setzt sich a derfir ein. Do muas a geplantes Haus schun amol um 20-30 m verschoben werden, damit der Blick aufn Kirchturm net versperrt werd. Find i a guat. Mein dem Tourismus wohlgesinntes Herz verschteat des.

Heit bin i ober wieder amol Meheal ummigfohrn. Zem hon i gsechn, dass die Baustöll in der J.-G.-Plazer-Str. weck isch und dass man wieder in Dorf aui fohrn konn. Ober.... wos isch des? Die gonze Stroß vom Eppanerhof aweck bis aui zum Logos isch roat asphaltiert. Jo, sou a roat, wia mans oftramol ba die Zebrastroafn oder ba die Radlweg sigg. Die gonze Stroß... aui und aui. (Foto werd nochgreicht, i versprichs)

Guat, es isch a gfahrlicher Obschnitt von der Stroß. Sicherheit geat vor, wenns denn hilft. Ober wo bleib der vielgeprießene, hochgejubelte und ba private Bauvorhoben gnodenlos durchgesetzte Ensemble-Schutz? Wars net gscheider gwesen, zwoa oder drei liegende Polizischten zu mochen?

Ba der Gelegenheit: i hoff, dass der Artikel im Überetscher Gemeindeblattl, in dem gsogg werd, dass es Lond firn Ausbau von der Mendelstroß im Tumortol obn unter a 80m longe und 8m broate Brugg und ondere Baumoßnohmen für 15 Mio. plant, wirklich lei a zu friaer Aprilscherz wor. Wall sell war jo super, Mendelrennen verbiatn, ober olls ala grande zuabetoniern. Und sell a nou in der Heach obn, so dass mans in gonzn Unterlond sigg. Wia gsogg: i konn do lei an an verschnellen Aprilscherz glabn... glocht hon i ober net.

Wia Südtirol Online heit schreib, eröffnet die Gesellschaft für deutsche Sprache a Zweigstelle in Südtirol.

Interessant.

Hmmm... wos isch es Ziel von der Zweigstelle in Südtirol? Auf gfds.de schteat unter onderem zu lesen: "Die GfdS hat sich zum Ziel gesetzt, die Sprachentwicklung kritisch zu beobachten und auf der Grundlage wissenschaftlicher Forschung Empfehlungen für den allgemeinen Sprachgebrauch zu geben." Aha. Kritisch zu beobochten und Empfehlungen für den ollgemeinen Sprochgebrauch zu geben. Also nix mehr mit Kreativiät?

Wölln de ins in Dialekt ausredn? Wölln de, dass mir olle reden wia die Bozner? (Schatzi, net da runter fohrn, da tusch dir noch weh) Wölln de dass mir olle Hoachdaitsch redn?

Ober magari (Schande über mich) isch des decht a guate Soch!

Grott hon i a bissele ummergeklickt und gschaug, wer sich im Internet mit insern Dialekt befosst. I hon tumm dreingschaug ondersch gschaug, bol i des gfundn hon. Oschpele - Wikipedia in Dialekt gschriebn... net letz!

Interessant sein a de Seitn, wo in Hochdeutsch unser Dialekt und die Bairische Sproch (wo a inser Dialekt zuigezählt werd) behondelt werdn. Sein mir Südtiroler eigentlich Bayern? Wos tat der Ander derzua sogn?

Logisch hon i nou a bissele weitergeklickt und bin draufkemmen, dass a die Striezis immene Dialekt pflegen! Bravo! A wenn net in an jedn der Weaner Slang gfolln muas (Ge, hebst die Paaapm, sunst kreagst a Foootzn ), isch es von mir aus gsechn absolut guat, dass es solche Enthusiaschtn gib, de sich die Zeit nemmen die eigene Mundort ins Web zu brengen!

Wenn man sou die Nochrichten aus und um Südtirol lest, muas man sich oftramol schun wundern. Do bleibn die Zug stean weil es Kupfer so tuier gwurdn isch, a nuie Schmetterlingsort werd über hundert Johr noch seiner Entdeckung ersch so richtig entdeckt und es Geld isch in der Bank a nimmer sicher.

Südtirol, quo vadis?